Beyond Boundaries… ou quizá deberiamos dicir Beyond Mandarinas

Hai proxectos que van máis alá dunha simple experiencia de aprendizaxe, e Beyond Boundaries foi sen dúbida un deles. Organizado por Active Vitorasko en Kosky, un pequeno pobo do sur da República Checa, reuniu a máis de 40 mozos e mozas europeos de Chequia, España, Romanía, Macedonia e Italia, que en poucos días nos convertemos nunha gran familia.

Desde o principio sentiuse algo especial. Os días estaban cheos de enerxía, risas e berros espontáneos de “IVO! IVO! IVO! ABRAZO COLECTIVO!”, que se converteu no noso himno non oficial. Moi pronto, o proxecto gañou un alcume agarimoso: Beyond Mandarinas, a sobremesa típica de cada comida, porque, coma as mandarinas, todos eramos diferentes por fóra pero compartiamos a mesma dozura por dentro (cursi pero certo) 🍊

A aventura comezou cunha visita cultural a Třeboň, unha vila histórica encantadora onde paseamos polas súas rúas e visitamos o arquivo rexional, descubrindo a historia da zona. Foi unha maneira curiosa de comezar a semana: conectando coa cultura checa antes de lanzarnos ás actividades ao aire libre.

O corazón de Beyond Boundaries foi a educación non formal ao aire libre. Aprendemos a través da natureza, do traballo en equipo e das experiencias compartidas: desde probar o disc golf (un deporte do que non tiñamos nin oído falar) ata facer unha camiñada polos bosques de Kosky, onde algúns valentes se atreveron a bañarse no lago en pleno outubro. Máis tarde visitamos a cidade de conto de Český Krumlov, paseamos polas súas rúas coloridas e vivimos un deses días que quedan gravados para sempre.

No noso aloxamento, a vida estaba chea de diversión e conexión. Entre partidas case profesionais de ping pong e bádminton (grazas aos macedonios!), noites de karaoke e longas conversas no jacuzzi, cada noite estivo chea de risas, amizade e momentos compartidos. As noites interculturais foron un dos momentos máis especiais, cheas de comida tradicional, bailes e curiosidades de toda Europa, lembrándonos o valiosa que é a diversidade cando se comparte co corazón aberto.

Un enorme agradecemento a Marek, Pavla e Zaneta, os organizadores incribles de Active Vitorasko, por crear unha semana tan cálida, inspiradora e equilibrada. Fixeron que todos nos sentísemos coma na casa e que cada actividade tivese un propósito real.

Despedímonos de Chequia cun último “IVO!” seguido do abrazo colectivo máis grande do proxecto. Beyond Boundaries lembrounos que os proxectos Erasmus+ non son só para aprender ou viaxar, senón para conectar, crear amizades e atopar alegría en cada momento compartido.

Ata a próxima tanda de mandarinas 🍊💛

Descarga o booklet sobre o proxecto aquí.

"Beyond Boundaries: outdoor education for a better inclusion" é un proxecto Erasmus+ aprobado e cofinanciado polo programa Erasmus+ da Unión Europea, organizado por Active Vitorasko coa colaboración de Valdeorras Vive.